У нас: 141825 рефератів
Щойно додані Реферати Тор 100
Скористайтеся пошуком, наприклад Реферат        Грубий пошук Точний пошук
Вхід в абонемент


на вечност меновите описаное, дЬтемъ, дочкамъ моимъ, не мает и не будет повинъна никоторое выправы и посагу давати, толко спокойное мешкане мети мает и то все держати и вживати на вечные часы и волна будет по животе и при животе своемъ дЬтем, дочкамъ своим, которой з них, албо тому, кому хуть и воля ее на то будетъ отдати, продати, даровати на церковъ Божую записати и такъ тымъ шафовати ведле воли и мысли своее, а дети, дочки мои вси и зятЬ мои не маютъ еи того забороняти и в тое ся вступовати, толко вечное молчане мети мают. А внука моя Овдюхна, дочка небожчика зятя моего Василя Красовъского, то мает малжонка моя княгиня Овдотя до себе взяти и ховати до лет ее, а коли лета свое мети будет, тогды мает еи и повинна будет с части своее дати пятнадцет копъ грошей готовых, две сверЬпы стадних, пят волов а три корове. А што се тычет тых пол и сеножатей, дерева бортного и гаевъ, што предки мое и я сам надали на церкви Бо//жии, на церковъ Чесного Хреста и на церковъ светого Дмитрия, в тои земли и в гаи цер[ков]нии жана, дЬти, дочки и зяти мои ничимся не мают вступовати и отцем (цер)кве Божи отыймовати. К тому теж, штося дотычет именя моего Ворсина, Чекня и двох ставовъ верхнихъ и млиновъ, пол, сеножатей, гаевъ, бобровых гонъ, ловов зверинних и пташих и дворища пустовского на Гънидаве, которое лежит недалеко от двора королевского, и вшеляких пожитковъ малых и великих, што с тым именям на тые две части приналежит, то все отписую дЬтем, дочкам моим Марухне, Настаси, Ганне, Масци и Полагъне, которые лета мают и которые лет не мают, если замуж пойдут, тогды то промежку собою на части ровные розделяти, водле права прирожоного, мают, которые еще замуж нешли, тые мают с частями своими, што на нихъ прийти мают, зо всим с тым каждая з нихъ при малжонце моей а матце своей кнегини Овдоти мешкати, а жона моя а матка их тых именей и всих пожитковъ ничим утратити не мает, але коли замуж пойдут, тогды то все им каждой з них в целости вернути мает. Ку тому теж которую сорок копъ грошей литовских, едучи на послугу господарскую до Ифлянт, // взял и позычил в зятя своего небожчика Василя Красовского и записал есми ему тую суму пенезей на именю моем отчизном Котелеви, то и тепер бым тестаментомъ моим, остатною волею своею, записую и той лист мой записний на тую сорок копъ грошей потвержаю, которое имене Котелев дочка моя Марухна Василевая Привередовская в той суме сороку копах грошей и до сего часу держитъ, тогды и дочки мои и сестры ее, коли замуж пойдут, а будет ли им в том кривда се видити, на первей они сами и зяти мои тую сорокъ копъ грошей власного долгу моего дочцЬ моей а сестрЬ своей Марухне всЬ ровными частми заплативши, тож тое имене Котелевъ на ровные части, ведъле права прирожоного, росделити и поровъняти на вечные и потомные часы мают, а не отдавши тыхъ сорока копъ грошей, ни в чом ся в тое именъе Котелевъ вступовати не мают иж до зуполъное заплаты. А въ опеку поручаю жону и дЬти мои приятелем своих их милости пану Михаилу Федоровичу Сербину Хорохорынс- кому, земли Волынское суди и повету Луцкого, а пану Анъдрею Ивановичу Русину, подста- ростему луцкому, а шурину своему пану Дмитру Олехновичу Козынскому. Якож если тот тестамент, остаточъную волю, на въряде в замку господарском Луцъком через // приятеля своего и черес лист свой оповедил и до книгъ врядовых зем. записати дал и на то дал есми малжоньце моей княгини Овдотьи Олехновне тот мой тестамент з моею печатью. А при том были и тому добре сведоми пань Войтех Красовский, воротный луцкий, на тот чась будучи на месцу пана Аньдрея Русина, подстаростего луцкого, в Луцку, а пань Федор Русинь, писарь луцкий, а пань Томило Ворона Боротиньский. Которые за прозбою моею печати свое приложили к сему моему тестаменту. Писан вь Еловичах лета Божего Нароженья тисяча пятсоть шестьдесять четвертого м[е]с[а]ця марца осмнадцатого дня.

У того листу печатей притисненых чотыри черзь таки р^р.

При котором актикованью того якобы тестаменту князя Якова Василевича Крокот- ки або Кропотки сведчился соленитер сам от себе и од всих пановь Еловицких урожоный его милость пань Захарияшь Боженець Еловицкий, столникь киевьский, секретар и писар его королевское милости, против тому титулови того то князя Крокотки або Кропотки, з Моськвы недавно не ведати яким способом выеханому и Еловицьким ся написанному, и противь печати гербови его, в котором под крыжом и хорогвою о двох розвиненыхь // коньцах, што здавна слынеть Боженец, гербь такий j-^ нашь дедичовь Еловицькихь, тот князь Крокотька межи тые два концы хоругьви гербу нашого свои три зубы або колки втрутил и вырыл в такую форму р^р и смелсе написати неслушне и неналежне титулом старожитным нашим власным Еловицким, по дедицтве нашом селе

Сторінки: 1 2 3 4 5 6 7 8 9 10 11 12 13